Храмы города Свято-Ильинский храм Свято-Георгиевский храм Софийский храм Свято-Духов храм Свято-Иверский храм Никольский Собор Часовня
|
|
Тропарь, глас 5:
Блаженная мати Софие, нетлением мощей и чудес сиянием почти тя Бог,
поминающе твое праведное житие, тя молим испросити телесем нашим здравие
и душам спасение.
Кондак, глас 4:
Приидите вси русстии жены, святую Софию восхвалим, уподобившуюся мудрым
девам, елей благодати Духа Святаго стяжавшим; темже умудри тя Господь
подвизатися во утверждении святыя Православный веры и соблюдати Церковь
Его непозыблему от ересей и расколов, сего ради благодарне воспоем ти:
радуйся, града Слуцка и всея земли нашея радосте и утверждение.
Молитва
О святая праведная мати наша, блаженная княгиня Софие, приими с любовию
приношение веры, надежды и любви нашея и вознеси ко Господу, и яко при
жизни была еси помощница и заступница всем православным Христианом земли
твоея, тако и ныне укрепи нас твердо и непоколебимо до смерти стояти за
веру православную, согрей сердца наша любовию ко Господу и Пречистей Его
Матери. Умоли Христа Бога нашего, да сохранит Церковь Свою святую от
расколов и ересей, да утвердит в ней дух правыя веры и благочестия, дух
ведения и любве, дух мира и радости вечной, да вси члены ея духом и
истиною покланяются Ему, да укрепит верных в благочестии и святости
жизни, да обратит отпадших от Православныя Церкве во святыя недра ея. О
святая мати, града Слуцка похвало и радосте, умоли Господа, да избавит
град твой и вся грады и веси Малый, Белый и Великия России от глада,
труса, потопа, огня, нашествия иноплеменных и междоусобныя брани, от
смертоносныя язвы, да низпослет правителем нашим усердие, прозорливость,
мудрость и верность, да управляют и судят по воле Его, да хранят
установления Святыя Церкве. Испроси всем с верою притекающим к раце
святых мощей твоих мирное житие, тишину, просвещение умов и
сердец, соблюди их от козней вражиих, от соблазнов мира, во зле лежащаго,
и от всякия скорби и нужды, обрати нас к покаянию и исправлению, даруй
заблудшим истины познание, недугующим исцеление. Упаси нас благодатными
твоими молитвами от всех врагов видимых и невидимых и сохрани от всякаго
зла, да прославим во вся дни жизни нашея Отца и Сына и Святаго Духа и
твое заступление во веки веков.
Аминь. |
|